TAUTA GRYB DZEIVŌT

Šī treis vōrdi pīdar rakstnīkam Ontōnam Rupaiņam, kod jys raksteja latgaļu atmūdas romānu − Tauta gryb dzeivōt, kuru izdeva Latgaļu izdevnīceiba 1963. gadā Minchenē. Vōrdi „Tauta gryb dzeivōt” izsoka ļūti daudz. Tai kai myusu tauta atsarūn napōrtrauktā apsīsteibā un latgalim pat drukōtais vōrds ir nūlīgts, latgaļu volūda nūlīgta, tys apdraud tautas eksistenci un izdzēš kulturas augšupeju. Tai nyu šūs vōrdu nūzeime klyust daudzkort lelōka un dziļōka, jā, pat svāta nūzeime.

Pi itōs skulpturas vārōtōjam kreit acīs divi linijas: pošā pamatā horizontālō un ūtra sleipō linija. Jo šōs divi linijas turpynōtu atpakaļvērzīnī, tad pēc kaida laika obas linijas sasatyktu vīnā punktā. Tymā punktā sōcās tautas aizvēsture. Massa, uz kuras stōv tāli, ir vēsture. Sleipō linija verzīnī uz prīkšu vad augšup un šai linijai navar byutu „grīstu”, nūzeimoj tautas kulturas atteisteibu uz augšu, kura nadreikst byut apdraudēta. Itī četri tāli reprezentej divi paaudzes tagadnē. Šūs paaudžu lūcekli nas tīseibu grōmotas: lyuk arī latgalim ir tīseibas dzeivōt un augšup īt!

Arī kotrai cytai tautai, naatkareigi nu tō, cik jei lela voi moza, taipat ir sova aizvēsture, vēsture un tīseibas dzeivōt. Taitod šys dorbs ir vyspōri pōrnacionāls. Kotra tauta gryb dzeivōt! Kōdēļ myusu tautai jōīt būjā?

Cilvēce nadreikst byut kūrla pret latgaļu tautas svātōkū sauksmi: Tauta gryb dzeivot! Tai sveiksim vīns ūtru ikdīnā sasateikūt vysūs apstōkļūs ar dzeiveibas vōrdim: Tauta gryb dzeivōt! Tys paleidzēs uzturēt tautyskū goru, pošapziņu un speitu, ar Dīva paleigu pōrdzeivot vysus nalaikus nōkūtnē.